豪華戲院結業 舊式戲院靈異事件逐個數

經營28年嘅舊式戲院「豪華戲院」早前宣布結業，而且將會拆卸重建。舊式戲院喺香港已經所剩無幾，而呢一類戲院除咗比現代戲院佔地較多之外，佢哋嘅特色就係經常傳出靈異事件，而家就同大家數一數啦！

豪華戲院

呢間戲院除咗有人見過有白色靈體出現之外，佢入面嘅女洗手間亦盛傳靈異事件。傳聞就係如廁時，有道長期打開嘅門口，會無故發出大力開門嘅聲音，而離開時走到下層，竟然都仲係女洗手間。呢啲傳聞令到唔少愛探靈嘅人士專誠造訪，甚至連ViuTV靈異節目《總有一瓣喺左近》亦曾去過拍攝。

金茂坪戲院

已經荒廢多年嘅金茂坪戲院位於秀茂坪，發展商曾經諗過改建，甚至將其放售，但都無人問津。相傳曾經多次有工人圖入內拆卸，不過都發生意外，之後由於太邪門嘅關係，就再沒有人敢接呢一單生意。而呢間戲院所處嘅位置曾經發生過山泥傾瀉，有唔少人遇難。另外，亦有報稱戲院嘅前身係日軍佔領香港時嘅行刑場。另一個傳聞就係80年代有一對情侶喺戲院放火自殺，好多觀眾走唔切，最後仲波及多人，不過呢段傳聞一直未經證實！

普慶戲院

呢間戲院位於彌敦道，當年曾經亦傳出過唔少靈異故事，例如有一個喺睇戲中途去廁所，去到女廁兩格都閂咗門。咁呢個女仔就唯有等，點知等咗幾分鐘一啲聲都冇，於是佢就拍門。一拍落去度門，門就打開，女仔就淨係望到一對紅色嘅繡花鞋，好整齊咁放喺廁格地下。之後，呢個女仔好驚，一回頭見到一個木無表情女人，仲語氣好惡咁叫佢快啲走。

東城戲院

位於灣仔嘅東城戲院前身係殯儀館，建於60年代嘅東城戲院，當年售票情況並不理想，但每每戲院卻出現全院滿座情況，而無綫劇集《全院滿座》就係得到呢個傳聞啟發而開拍！另一個傳聞就係有一名女觀眾喺洗手間照鏡嘅時候，乍見身邊一位冇五官嘅女子，於是慌忙離開。之後佢喺門口見到有個女人正想入洗手間，於是佢就諗住好心提佢，點知一望個女人，正正就係頭先喺洗手間嗰個女人。

坪洲戲院

除咗市區之外，離島都曾經有多間戲院，其中坪洲戲院就荒廢咗好多年，後來呢度仲變成尋幽探秘嘅聖地。喺2010年，曾經有一名巡警路經戲院，聽到戲院內有腳步聲，於是就入去查看。點知就發現有一個男人喺入面自殺，自此村民經過戲院附近周不時都會聽到有人行嘅腳步聲！